ٻالڪ اوستا

     مائٽن جو اثر اولاد تي ضرور ٿئي ٿو. پٿوري جا وڏا هن وقت جيتوڻيڪ زماني جي گردش ڪري ڪجهه پست حالت ۾ هئا پر نيٺ به راجائي ڪل مان هئا، جنهن ڪري سڀاويڪ خاندان گڻ سندس ڪٽنب ۾ موجود هئا. سندس پيءُ تي درويشن ۽ فقيرن جو ڪافي اثر هو، جنهن ڪري سدائين انهن جي صحت جو طالبو رهندو هو ۽ سندس دل دنيا تان کٽي ٿي رهي هئي، سندس ايشور ڀڳت پتا جو مٿس ڪافي اثر پيو، سندس پتا درويشن جي سنگت ۾ رهڻ ڪري ايشور ڀڳت هو، اهو اثر سڀاويڪ سندس پٽ تي به ٿيو
سندس ماتا اوچ ڪل جي راجپوتڻ هئي. و سُشيل، پتورتا، سلڇڻي ۽ ڌرمست هئي. شاديءَ بعد ۱۲ سال اولاد لاءِ سڪايل هئي جنهنڪري سندس هردم هيڪاري ڪومل رهندو هو. وير مائٽن کي ئي اهڙا پتر پيدا ٿيندا آهن، سنت تلسيداس چيو آهي ته:
جنني جڻي تو هرجڻ جڻي داتا ڪا سور
نهن تو رهڻي وانجهڻي مت گائني نور
پٿورو جيئين وڏو ٿيندو ويو تيئن سندس دل جو لاڙو ڌڻي جي محبت ڏانهن ٿيڻ لڳو، جنهن ڪري ساڌ سنگت، فقيرن ۽ درويشن جي ديدار لاءِ سدائين تڙپندو هو. ڪو ساڌو سنت پير فقير، اولياء يا درويش سندن ڳوٺ ۾ ايندو هو ته ان سان محبت وچان سندن خدمت ڪندا هئا. ڪڏهن ڪڏهن ڀرسان جي ڪنهن الله جي عاشقن جي ڏس پوندو هو ته اتي وڃي درشن ڪندا هئا. ظاهري علم ڪو نه پڙهيا، پر حقيقي علم حاصل ڪيائون ۽ ان جا سدائين ڳولا ۽ طالبو هئا. بيدل فقير فرمايو آهي

اکر ان دي وچ جوئي اڙيا
عشق جي چاڙهي مول نه چڙهيا

 (”پير پٿورو شيوا منڊلي“ پاران ڇپايل ڪتابڙي ”شري پير پٿورو“ تان کنيل)